Levian Goga, shqiptari nga Berati që u bë simbol i guximit dhe humanizmit pas aktit të tij heroik në lumin Arachthos,
ndodhet aktualisht në spitalin e Artës për shkak të komplikacioneve në frymëmarrje.
Ngjarja tronditëse ndodhi të mërkurën e kaluar, kur Goga, pa hezituar, u hodh në lumë për të shpëtuar dy fëmijë të mitur që po mbyteshin.
Pas shpëtimit dramatik, ai shfaqi kollë të fortë dhe probleme me frymëmarrjen, çka e detyroi të kërkonte ndihmë mjekësore.
Mediat greke raportojnë se pas një vizite te një mjek privat, Goga u këshillua t’i nënshtrohej analizave të specializuara në spital. Ministri grek i Shëndetësisë, Adonis Georgiadis, ndërhyri personalisht duke urdhëruar dërgimin e një ambulance që e transportoi menjëherë në spitalin e Artës. Sipas burimeve spitalore, gjendja e tij nuk paraqet rrezik për jetën, por po monitorohet me kujdes.
Një akt heroik që tronditi Greqinë
Goga, i cili ndodhej në një kafene pranë vendit të ngjarjes, e braktisi gjithçka sapo dëgjoi britmat dhe u hodh në ujërat e rrëmbyeshëm të lumit Arachthos për të shpëtuar dy djemtë e mitur që po mbyteshin. Dy fëmijët, një 14-vjeçar dhe një 12-vjeçar, kishin rënë në lumë gjatë një loje dhe fatkeqësisht, pësuan vdekje klinike, sipas raporteve të mediave greke.
Prindërit e të miturve kanë marrë një vendim tejet fisnik, duke dhuruar organet e fëmijëve të tyre për të shpëtuar jetë të tjera.
Do të nderohet me shtetësi greke
Aktit të Gogës nuk i kanë munguar as reagimet e mirënjohjes. Autoritetet greke kanë paralajmëruar se ai do të nderohet me shtetësinë greke për veprimin e tij të jashtëzakonshëm. Një vendim që është përshëndetur gjerësisht si një akt simbolik i vlerësimit për kontributin njerëzor pa dallime kombësie.
Levian Goga ka emigruar në Greqi 24 vjet më parë, në moshën 17-vjeçare. Ai ka kaluar pjesën më të madhe të jetës në Athinë, duke punuar në kushte të vështira. Sot jeton në qytetin e Artës me bashkëshorten dhe dy fëmijët e tij, 10 dhe 6 vjeç, në një jetë të qetë dhe modeste – derisa një akt i jashtëzakonshëm guximi e bëri atë një hero të heshtur të dy popujve.