Ngjarja e rëndë në Fier: Rozalinda Plaku dëshmon në polici pas tragjedisë së rëndë

Rozalinda Plaku, ish-partnerja e Refit Buzit, është larguar nga spitali drejt Komisariatit për të ofruar dëshminë e saj mbi ngjarjen tragjike të regjistruar në Vidhisht të Fierit, ku autori i ngjarjes i dha fund jetës pas një ndërhyrjeje policore që zgjati 9 orë. Ajo pritet të shpjegojë rrethanat dhe rrjedhën e ngjarjeve që kulmuan me vdekjen e babait të saj, plagosjen e rëndë të nënës dhe rrëmbimin e saj nga 35-vjeçari.

Gjatë orëve të hershme të mëngjesit në Roskoves, autori ndërmori sulmin e përgjakshëm ndaj familjarëve të ish-të fejuarës, përpara se të lëvizte drejt Kurjanit.

Në këtë fshat, pak kilometra larg vendit të krimit, ai vendosi ta lirojë vajzën dhe të barrikadohej brenda automjetit.

Operacioni u monitorua nga afër nga forcat RENEA, ku një snajperist mori pozicion në kodrën e Kurjanit për të ndërhyrë në rast nevoje, ndërsa zyrtarë dhe efektivë të policisë iu afruan mjetit për negociata.

Pavarësisht përpjekjeve për të biseduar me të nga një distancë minimale prej më pak se 5 metrash, Nertil Buzi, i njohur ndryshe edhe si Refit Buzi, nuk pranoi në asnjë moment të dorëzohej.