Një ngjarje e rëndë ka tronditur komunitetin e Colle di Val d’Elsa në Itali, ku ka humbur jetën tragjikisht 33-vjeçari shqiptar Xhovalin Musaraj. I riu u zhduk pasditen e së dielës, më 5 korrik, pasi u hodh për t’u larë në lumin Elsa, por nuk arriti të dilte më në sipërfaqe.
Ngjarja ndodhi në zonën mes Gore Rotte dhe urës së Spugnës, një pikë e frekuentuar nga qytetarët gjatë ditëve të nxehta të verës, ku thellësia e ujit arrin rreth 2.5 metra.
Sipas mediave italiane, Musaraj ishte së bashku me disa të afërm në momentin kur u fut në ujë. Kur familjarët vunë re se ai nuk po dilte më në sipërfaqe, u dha menjëherë alarmi dhe nisi operacioni i kërkim-shpëtimit.
Në vendngjarje mbërritën ekipet e urgjencës 118, zhytësit e Livornos të transportuar me helikopterin “Drago 127” nga reparti i fluturimit në Arezzo, si dhe karabinierët e Poggibonsit.
LEXO EDHE
-
-
-
Për disa orë, ekipet e kërkimit kontrolluan lumin në përpjekje për ta gjetur të riun. Shpresa u shua rreth orës 19:00, kur zhytësit gjetën trupin e 33-vjeçarit pa shenja jete.
Ende nuk janë të qarta shkaqet e vdekjes. Dyshimet paraprake lidhen me një problem të papritur shëndetësor, një ndryshim të fortë temperature mes ujit dhe ajrit, ose me një vorbull nënujore që mund ta ketë tërhequr.
Sipas raportimeve, nuk është parashikuar për momentin kryerja e autopsisë, ndërsa pritet të mjaftojë ekzaminimi i jashtëm i trupit. Vdekja e shqiptarit ka lënë në dhimbje familjarët dhe komunitetin lokal. Familja Musaraj është në gjendje të rënduar pas humbjes së 33-vjeçarit.
